1, 8 Conoguda causa sia que cum en Bernard de Blanquafaurga, cauoyrs, de
1, 9 la parropia de Sent-Suplici, qui fo, agos dat, legat et leyssat, en son darder
1, 10 testament, a Aymes, son filhon, et filh en pey d’Angladas, cauoyr, tot
1, 11 quant que lo medis en Bernard de Blanquafaurga agos ni auer degos en
1, 12 ladeita parropia Sent-Suplici, ni Entre-Dordonha, ni en tot Entre-dos-Mars,
1, 13 per ayssi cum es contengut en carta deu medis testament, feita per min
1, 14 Guailhart de Budos, cartolaris de Bordeu.

1, 15 Es assaber, que Gaucem Dodon, de ladeita parropia Sent-Suplici,
1, 16 affeuatz, si cum disso deudeit en Bernard de Blanquaforgua, qui fo,
1, 17 reconogo et conffedi que ed aue pres et recebut bestidon deudeit en Pey
1, 18 d’Angladas, en nom et en loc deudeit Aymes, son filh, de tot aquet cazau,
1, 19 ab lo loc en que es, ab totz sos apertenemetz, loquaus es en ladeita
1, 20 parropia Sent-Suplici, au loc aperat au Cazau Arnaud Deu Poiau, ayssi
1, 21 cum es entre la terra Ramon de Lasauba, d’una part, et la bia comunau
1, 22 qui ba a mayson W. Arrobert, d’autra part.

1, 23 E de tot aquet treus de binha, ab lo loc en que es, ab totz sos
1, 24 apertenementz, loquaus treus de binha es au loc aperat au Planter, ayssi cum
1, 25 es entre la terra Fort deu Molinar, d’una part, et la terra deu Caperan,
1, 26 d’autra.

2, 1 E de tot aquet autre treus de binha, ab lo loc en que es, ab totz sos
2, 2 apertenementz, lo quaus es au loc aperat a Lartigua, ayssi cum es entre la
2, 3 binha Ayquem de Lagarrossa, d’una part, et lo prat Ramon Faur, d’autra.

2, 4 E de tot quant que lo medis Gaucems a et auer deu deu cap deu Cazau
2, 5 Gaucem de Labatut en jusca a la gran bia comunau qui ba en la Palu.

2, 6 Et lo deitz en Pey d’Angladas, en nom et en loc deudeit Aymes, son
2, 7 filh, a l’enbestit deu tot, feuaumentz, so es assaber:

2, 8 Deudeit Cazau deu Poiau ab II. deners d’esporle a senhor mudant, e per
2, 9 III. sol et una gualina de cens, rendeutz, cascun an, lendeman de Nadau.

2, 10 E deudeit treus de binha, qui es au Planter, ab II. deners d’esporle a
2, 11 senhor mudant et per lo quart deu fruit qui baira cascun an et II. deners
2, 12 a la guarda, cada dia que criguera a bendemihar.

2, 13 E deudeit treus de binha qui es a Lartigua, a II. deners d’esporle a
2, 14 senhor mudant, et per lo quart deu fruit qui baira cascun an et II. deners
2, 15 a la guarda, cada dia que criguera a bendemihar.

2, 16 E de tot quant que lo medis Gaucem Dodon a et auer deu deudeit cap
2, 17 de Cazau, en jusca a ladeita gran bia qui ba en la Palu, ab II. deners
2, 18 d’esporle a senhor mudant et per l’agraira deu fruit qui baira en tot,
2, 19 cascun an. Loquau auantdeit cens e losdeitz quartz de lasdeitas binhas
2, 20 et ladeita agreira, portat tot et arrendut, cascum an a Blanquaforgua, a
2, 21 l’estatga deudeit en Bernard, qui fo. E espolar et far dreit aqui medis, si
2, 22 tort li corelhaua eus feus.

2, 23 E en aquesta maneira lodeitz en Pey d’Angladas, en nom et en loc
2, 24 deudeit Aymes, son filh, a l’en mandat et promes, sotz obligacion de totz
2, 25 sos bens, estre bons senher de part senhoria, las senhorias deudeit Aymes,
2, 26 son filh, saubas, e sos dreitz saups desus mentagus, et sos autres deuers
2, 27 ataus cum senher las deu auer en son feu et sobre son affeuat, aus fors
2, 28 et a las costumas de Bordales.

2, 29 Actum fuit secunda die exitus maii, anno Domini M° CC° LXXX°. Regnante
2, 30 Eodoart, rey d’Anglaterra; Symon, arcibesque de Bordeu; Pey Esteue,
2, 31 maior. Tests sunt : Pey Baudoyn, Franconet de Sent-Alary, Arnold
2, 32 Esteue, bordes de Bordeu; W. Perbost, Seguin de Noalhas, Fortz de
2, 33 Bareiras et Guialhart de Budos, qui la carta escriuo.